ஐரோப்பிய நாடுகளில் கொரோனா வைரஸின் 2-வது சுற்று பரவ தொடங்கி உள்ளது. குறிப்பாக பிரான்ஸ் நாட்டில் கொரோனா வைரஸ் தொற்று உச்சத்தில் உள்ளது. பிரான்ஸ் நாட்டில் கொரோனா வைரஸ் தாக்குதலால் பாதிப்பு அடைந்தோர் எண்ணிக்கை 13 லட்சத்துக்கு மேல் அதிகரித்துள்ளது. கொரோனா வைரஸ் தொற்றால் அந்த நாட்டில் உயிரிழந்தோர் எண்ணிக்கை 36 ஆயிரத்து கடந்துள்ளது.
இங்கிலாந்தில் சென்ற 48 மணி நேரத்தில் புதிதாக கொரோனாவில் 25 ஆயிரத்துக்கும் அதிகமானோர் பாதிக்கப்பட்டுள்ளனர், அதிக பேர் உயிரிழந்தும் உள்ளனர். ஒட்டுமொத்தப் பாதிப்பு ஒன்பது லட்சத்தைக் கடந்துள்ளது. இந்த நிலையில், இங்கிலாந்தில் மீண்டும் கொரோனா வைரஸ் பாதிப்பு தீவிரமாகப் பரவி வரும் நிலையில், அங்கு நாடு முழுவதும் ஊரடங்கு அமல்படுத்துவது குறித்து அந்த நாட்டு அரசு ஆலோசித்து வருவதாக தகவல் வெளியானது. இங்கிலாந்து அரசின் கொரோனா தடுப்பு ஆலோசனைக் குழுவின் உறுப்பினரும், தொற்றுநோய் தடுப்பு வல்லுநருமான ஜான் எட்முன்ட்ஸ் கூறுகையில், பிரதமர் போரிஸ் ஜான்ஸன் அறிவித்த கட்டுப்பாடுகள் நிச்சயம் நோய்த் தொற்றைக் குறைக்கவோ, கட்டுப்படுத்தவோ உதவாது. ஆதலால், அத்தியாவசியப் பணிகளைத் தவிர்த்து மீண்டும் நாடு முழுவதும் ஊரடங்கு பிறப்பிக்க வேண்டும் என அறிவுறுத்தியுள்ளோம் என்று கூறினார்.
இதனை தொடர்ந்து இங்கிலாந்தில் வரும் நவம்பர் மாதம் 5 ஆம் தேதி முதல் டிசம்பர் மாதம் 2 ஆம் தேதி வரை முழு ஊரடங்கு அமல்படுத்தப்படுவதாக இங்கிலாந்து பிரதமர் போரிஸ் ஜான்சன் அறிவித்துள்ளார். இந்த புதிய ஊரடங்கில் அத்தியாவசியமில்லாத பணிகள், கடைகள், அனைத்தும் மூடப்படும் என்றும் அறிவிக்கப்பட்டுள்ளது. இதற்கு முன் அறிவிக்கப்பட்ட முழு ஊரடங்கை போல் இல்லாமல் இந்த முறை பள்ளிகள், கல்லூரிகள் திறந்திருக்கும் என்றும் மாணவர்கள் விரும்பினால் வரலாம் என்றும் தெரிவிக்கப்பட்டுள்ளது. இது குறித்து போரிஸ் ஜான்சன் பேசுகையில், “நாம் எதிர்பார்த்தை விட ஐரோப்பிய நாடுகளில் தற்போது கொரோனா வைரஸின் 2வது சுற்று வேகமாக பரவி வருகிறது. எனவே நாம் முன்னெச்சரிக்கை நடவடிக்கைகளை மேற்கொள்ளாவிட்டால் கடந்த ஏப்ரல் மாதம் ஏற்பட்டதை விட மிக மோசமான விளைவுகள் நமக்கு ஏற்பட வாய்ப்புள்ளது. இது போன்ற கடுமையான ஊரடங்கு நடவடிக்கைகள் மூலம், கொரோனா தொற்று பாதிப்பு எண்ணிக்கையை நாம் கட்டுப்படுத்த முடியும் என்ற நம்பிக்கை உள்ளது” என்று தெரிவித்துள்ளார்.
Follow @ Google News: கூகுள் செய்திகள் பக்கத்தில் அறிவியல்புரம் இணையதளத்தை இங்கே கிளிக் செய்து பின்தொடருங்கள்!!! தற்போதைய செய்திகளை உடனுக்குடன் தெரிந்து கொள்ளுங்கள்.
அறிவியல்புரம் YouTube வீடியோக்களை கண்டுகளிக்க இங்கே கிளிக் செய்யவும்
